གངས་ལྗོངས་བྱ་མ་རྟ་ངོ་སྤྲོད་ཡིག་བརྒྱ་མ།

གངས་ལྗོངས་བྱ་མ་རྟ་གཙུག་ལག་བོད་ཀྱི་རིག་གནས་དྲ་བ་ནི་མཐོ་སྒང་འདིིར་སྔར་བྱུང་ཡོད་པ་དང་ད་ལྟའང་འབྱུང་བཞིན་པའི་རིག་གནས་སྤྱི་དང་དེ་མིན་དཔལ་འབྱོར་དང་ཚན་རྩལ། དད་མོས་དང་ཡུལ་སྲོལ། ཐ་དད་པའི་རིག་ཚན་སོ་སོའི་ནང་དཀའ་བ་བརྒྱ་ཕྲག་ཁྱད་དུ་བསད་ནས་གསར་གཏོད་དང་རྒྱུན་འཛིན་ལ་བྱས་རྗེས་ཆེ་མ་ཆུང་གསུམ་འཇོག་བཞིན་པའི་ཕོ་མོ་རྒན་དར་གཞོན་གསུམ་གྱི་བརྩམས་ཆོས་རིགས་གང་རུང་གི་བདག་དབང་ལ་སྲུང་སྐྱོབ་དང་རྒྱ་ཁྱབ་ཏུ་དར་སྤེལ་བྱེད་ཕྱིར་སྐྲུན་པའི་མ་ལག་ཅིག་ཡིན། མ་ལག་འདིར་བྱེ་བྲག་ལྟ་ཀློག་དང་ཉན་ཐོས། གཟུགས་བརྙན་དང་རོལ་དབྱངས། དུས་ཐོག་སློབ་སྦྱོང་སོགས་ད་སྔ་ལག་ལེན་ལྡན་པའི་ཆ་འཕྲིན་ལག་རྩལ་ལ་བརྟེན་ནས་དམིགས་ཡུལ་ཐ་དད་ཀྱི་སློབ་སྦྱོང་མཁན་དང་རོལ་མྱོང་མཁན་ཚོར་སྣ་འཛོམས་དང་ཡོངས་འདུས་ཀྱི་རྒྱུ་ཆ་སྣ་ཚོགས་རིན་མེད་གཟིགས་འབུལ་དང་། རིག་གནས་སྤྱིའི་ནང་ངོགས་སོ་སོ་གཟུགས་སྒྲ་དྲི་རོ་རེག་བྱ་ལྟ་བུའི་སྒོ་ནས་ཁྱེད་ཚོར་ཕུལ་བ་འདིས། རིག་གནས་ཁ་འཐོར་དང་དགའ་ཕྱོགས་འཐེན་ཁྱེར་ལ་འགྲོ་བཞིན་པའི་སྤྱི་ཚོགས་སྣང་ཚུལ་དེར་ཡང་བསྐྱར་སྐེ་རག་ཅིག་བསྡམས་པ་ཡིན།

ལས་དོན་འདི་ཧ་ཅང་གལ་ཆེ་བའི་གནས་བབས་ལ་བསམ་ནས་ངེད་ལས་བཟོ་ཚོ་ཆུང་གིས་ལས་གཞི་འདིའི་མིང་ལ་བྱ་མ་རྟ་བཏགས་པ་ཡིན་ལ། དེའང་མ་ལག་འདིར་ཞུགས་མཁན་གྱི་རོང་འབྲོག་མེད། མཁས་བླུན་མེད། ཆོ་ག་དབྱེར་མེད་དུ་བོད་མི་ཐེ་བོང་ཙམ་ཡན་ཐུན་མོང་ལ་དབང་བ། མ་ལག་འདི་བརྒྱུད་ནས་ཕྱོགས་སོ་སོའི་ཤེས་བྱ་མཁོ་འདོན་བྱ་མཁན་གྱི་གལ་ཆེ་བའི་ཕོ་ཉ་དེ་ཁྱེད་རང་ཉིད་ཡིན།

མ་ལག་འདིར་ཞུགས་པ་ནས་བཟུང་། ཁྱེད་ཀྱི་མཚན་དེ་ཁྱེད་ཀྱི་དཔེ་སྒྲོམ་ལ་འདྲེས་ཡོད་ལ། སྐབས་རེར་སུན་པོའི་དབང་གིས་སེམས་གསོ་བའི་རྐྱང་གཞས་རེ་དང་འུར་ཚ་བའི་བརྙན་གཟུགས་རེ་ལའང་འབྱར་ཡོད། མདོར་ན། བྱ་མ་རྟའི་རུ་དཔུང་ལ་ཞུགས་པ་ནས་བཟུང་ཁྱེད་ལ་བར་མ་ཆད་པའི་སློབ་སྦྱོང་གི་འདུ་ཤེས་དང་ད་དུང་ཤེས་བྱ་མཉམ་སྤྱོད་ཀྱི་སྤོབས་པ་དང་ལྷག་བསམ་ཀྱང་བཞུགས་དེ། དུས་ནམ་ཡང་བརྩམས་ཆོས་གསར་བ་དང་ཀུན་ཕན་བརྙན་རིས་དག་རང་མོས་ཀྱིས་བཀོད་དེ། ཡང་བསྐྱར་མཐོ་སྒང་འདིའི་མ་འོངས་བར་ཁྱེད་ཀྱི་ཁ་མདོག་མཚར་བའི་མཛེས་སྡུག་གསར་བ་རེ་ངོམས་ཆོག