རྣལ་འབྱོར་གྱི་དབང་ཕྱུག་རྗེ་བཙུན་མི་ལ་རས་པའི་རྣམ་པར་ཐར་པ་དང་ཐམས་ཅད་མཁྱེན་པའི་ལམ་སྟོན་མགུར་འབུམ་དང་བཅས་པ་འདི་ནི་རབ་བྱུང་བརྒྱད་པའི་ས་སྤྲེལ1488ལོར་གཙང་སྨྱོན་ཧེ་རུ་ཀ་རུས་པའི……
- རྩོམ་པ་པོ།རྣལ་འབྱོར་བ་རུས་པའི་རྒྱན་ཅན།
- བཟོ་བསྐྲུན་པ།འབྲི་གུང་བཀའ་བརྒྱུད་གཙུག་ལག་སློབ་གླིང་།
རྣལ་འབྱོར་གྱི་དབང་ཕྱུག་རྗེ་བཙུན་མི་ལ་རས་པའི་རྣམ་པར་ཐར་པ་དང་ཐམས་ཅད་མཁྱེན་པའི་ལམ་སྟོན་མགུར་འབུམ་དང་བཅས་པ་འདི་ནི་རབ་བྱུང་བརྒྱད་པའི་ས་སྤྲེལ1488ལོར་གཙང་སྨྱོན་ཧེ་རུ་ཀ་རུས་པའི་རྒྱན་ཅན་ནམ་མཚན་དངོས་སངས་རྒྱས་རྒྱལ་མཚན་དུ་འབོད་པས་མི་ལ་རས་པ་དང་རས་ཆུང་པ་གཉིས་ཀྱིས་དྲི་བ་དང་དྲིས་ལན་གྱི་ཚུལ་དུ་གསུངས་པའི་རྣམ་ཐར་རྟོགས་བརྗོད་དུ་བརྩམས་པར་མཛད་པ་ཡིན་ལ། དེའང་ཐོག་མར་ཡབ་མེས་བརྒྱུད་པའི་འབྱུང་ཁུངས་དང་བཅས་ཏེ་སྐུ་བལྟམས་པའི་མཛད་པ་དང༌། གཉིས་པ་ཉེ་བ་དགྲ་རུ་གྱུར་ཏེ་སྡུག་བསྔལ་བདེན་པ་ཐུགས་ཉམས་སུ་བཞེས་པའི་མཛད་པ་དང༌། གསུམ་པར་མཐུ་བསྒྲུབས་ནས་དགྲ་བོ་རྣམས་ཚར་བཅད་པའི་མཛད་པ་སྟེ་ཐུན་མོང་འཇིག་རྟེན་པའི་མཛད་པ་གསུམ་དང༌། མཚན་ལྡན་གྱི་བླ་མ་བཙལ་བའི་མཛད་པ་དང༌། དཀའ་སྤྱད་ཀྱིས་སྒྲིབ་པ་སྦྱངས་པའི་མཛད་པ་དང༌། སྨིན་གྲོལ་གྱི་གདམས་པ་ཐོབ་པའི་མཛད་པ་དང༌། ཉམས་རྟོགས་ཀྱི་མྱུ་གུ་འཁྲུངས་པའི་མཛད་པ་དང༌། ཆིག་བརྒྱུད་ཀྱི་གདམས་ངག་ཐོབ་སྟེ་བླ་མའི་དྲུང་ནས་བྱོན་པའི་མཛད་པ་དང༌། སླར་ཡང་སྒྲུབ་ལ་ཡིད་དམ་བཅས་པའི་མཛད་པ་དང༌། རྩེ་གཅིག་རི་ལ་བསྒོམས་པའི་མཛད་པ་དང༌། སྒྲུབ་འབྲས་མངོན་དུ་གྱུར་ཏེ་འགྲོ་དོན་སྤེལ་བའི་མཛད་པ་དང༌། གཟུགས་སྐུ་ཆོས་དབྱིངས་སུ་བསྡུས་པའི་མཛད་པ་ཞི་བ་མྱང་འདས་ཀྱི་མཛད་པ་དགུ་བཅས་མཛད་ཆེན་བཅུ་གཉིས་ཀྱི་རྣམ་པར་ཐར་པའི་ཚུལ་ཟབ་ཅིང་རྒྱ་ཆེ་བ་རྣམས་ཚིག་བཅད་ལྷུག་སྤེལ་མའི་གཏམ་དུ་བྱས་པའོ།།