ཀྲུང་གོ་དཔལ་འབྱོར་སྟོན་ཕྱོགས་ཚགས་པར་ཐོག་གནས་ཚུལ་སྤེལ་བར་གཞིགས་ན། ཉེ་ཆར་ཀྲེ་ཅང་ཞིང་ཆེན་དབུན་ཀྲོའུ་གྲོང་ཁྱེར་ཨོའུ་ཧའེ་ཆུས་སྲིད་གཞུང་དང་སི་ཁྲོན་ཞིང་ཆེན་རྔ་པ་ཀྲོའུ་རྔ་པ་རྫོང་སྲིད་གཞུང་གིས་གཙོ་གཉེར་བྱས་པའི“ཐོན་ལས་དབུལ་སྐྱོར་གྱིས་ཞིང་པར་འབབ་འཕར་བཏོད”ཅེས་པའི་རྔ་པའི་མི་བརྒྱའི་ཐད་གཏོང་དུས་ཆེན་རྔ་པ་རྫོང་དུ་དངོས་སུ་སྤེལ་འགོ་ཚུགས་པ་རེད། ད་ཐེངས་ཀྱི་ཐད་གཏོང་དུས་ཆེན་གཉེར་བའི་དམིགས་ཡུལ་ནི་མིག་སྔར་དར་བཟོ་ཆེ་བའི“ཐད་གཏོང་ཟོག་ཚོང”གི་བྱེད་ཐབས་ལ་བརྟེན་ནས། རྔ་པ་རྫོང་གི་ཐོན་ལས་དབུལ་སྐྱོར་གྱི་ལམ་བུ་རྒྱ་ཆེར་བཏང་སྟེ། རྔ་པ་རྫོང་གི་ཞིང་འབྲོག་ཐོན་ལས་དྲ་ཐོག་ཚོང་དོན་དང་། རིག་གནས། ཡུལ་སྐོར་སོགས་ཁྱབ་ཁོངས་སུ་ཕྱོགས་ཡོངས་ནས་རིམ་སྤོར་བྱ་རྒྱུར་སྐུལ་འདེད་བཏང་ནས། ཞིང་འབྲོག་པའི་ཡོང་འབབ་སྔར་བས་མང་དུ་གཏོང་ཆེད་རེད།

འགོ་ཚུགས་མཛད་སྒོ་མཇུག་འགྲིལ་རྗེས། རྔ་པ་རྫོང་གི་རྫོང་དཔོན་གྱིས་སྣེ་ཁྲིད་འོག་རྒྱལ་ཡོངས་ཀྱི་ས་གནས་ཁག་ནས་ཡོང་བའི་གྲགས་ཅན་ཐད་གཏོང་པ་བརྒྱ་ལྷག་ཙམ་གྱིས་མཉམ་དུ་རྔ་པའི་མགྲིན་ཚབ་པ་བྱས་ཏེ་ཚོང་ཟོག་འཚོང་འགོ་ཚུགས། ཐད་གཏོང་དུས་ཆེན་གྱི་ཉིན་དེར་མི་བརྒྱའི་ཐད་གཏོང་ལ་དྲ་ཐོག་ནས་ལྟ་མཁན་ཁྲི་6ཙམ་ཟིན་པ་དང་། མོས་འདེབས་བྱེད་མཁན་ཁྲི་14ལྷག་ཙམ་ཟིན་པ། ཉིན་དེར་ཕྱིར་ཚོང་གྲངས་འབོར་སྒོར་ཁྲི་312ལས་བརྒལ་ཡོད།

དེ་སྔའི་ས་གནས་གཉིས་ཀྱི་སྒྲུབ་འགན་འཁུར་མཁན་ཚན་པ་དབུན་ཀྲོའུ་ཧུང་ཞིའུ་ཀྲའོ་ཆ་འཕྲིན་ཚན་རྩལ་ཚད་ཡོད་ཀུང་སི་དང་རྔ་པ་རྫོང་བཀྲ་ཤིས་ནོར་ནོར་དྲ་ཐོག་ཚོང་དོན་ཚད་ཡོད་ཀུང་སིས་སྔ་རྗེས་སུ་ས་གནས་གཉིས་ཀྱི་སྲིད་གཞུང་གི་འཁྱུག་དབྱིངས་ཐོག་ཨོའུ་རྔའི་བརྙན་ཐུང་གསར་རྩོམ་གྱི་མཛའ་གྲོགས་འགྲན་བསྡུར་སྤེལ་ནས། ད་ཐེངས་ཀྱི་ཐད་གཏོང་དུས་ཆེན་ལ་བརྩམས་ཆོས་ཆིག་སྟོང་ཙམ་གྲ་སྒྲིག་དང་ཇུས་འགོད་བྱས་ཡོད། ཐད་གཏོང་དུས་ཆེན་མ་འཚོག་གོང་། རྔ་པ་རྫོང་དུ་དྲ་ཐོག་ཚོང་དོན་གྱི་དྲ་ཕྱིའི་གསོ་སྦྱོང་ཚོགས་འདུ་འཚོགས་ཤིང་། ཧུང་ཞིའུ་ཚོང་ལས་སློབ་གླིང་གི་སློབ་དཔོན་གྱིས་རྔ་པ་རྫོང་གི་ཁེ་ལས་མཁས་ཅན་དང་། ཐོན་སྐྱེད་བཟོ་གྲྭ ཚོང་དུད་། ཞིང་དུད་བཅས་དང་དེ་བཞིན་དྲ་ཐོག་ཚོང་དོན་ལ་དབྱིངས་ཞུགས་མཁན་ན་གཞོན་ཚོར་དྲ་ཐོག་ཚོང་དོན་གྱི་རྨང་གཞིའི་ཤེས་བྱ་ཁྱབ་གདལ་བཏང་བ་དང་། དུས་རབས་གསར་པ་དང་དར་སྲོལ་གསར་པའི་བརྙན་ཐུང་ནང་དོན་བཟོ་བའི་ཁྲོམ་རའི་རྒྱབ་ལྗོངས་དང་དེ་བཞིན་ཐད་གཏོང་ཟོག་ཚོང་གི་གཞི་རྩའི་གོ་དོན་དང་བཀོལ་སྤྱོད་བྱེད་སྟངས་འགྲེལ་བཤད་བརྒྱབ་ཅིང་། རྔ་པ་རྫོང་གི་ཁེ་ལས་37གསོ་སྦྱོང་ལ་ཞུགས་པ་རེད།

2013ལོར་བར་ཐག་སྤྱི་ལེ་2300ཡོད་པའི་ཨོའུ་ཧའེ་དང་རྔ་པའི་དབར་ཁ་གཏད་རོགས་སྐྱོར་གྱི“ཆ་སྒྲིག”བྱེད་འགོ་ཚུགས་པ་དང་ད་བར་ལོ་7སོང་ཞིང་། ས་གནས་གཉིས་ཀྱིས་ཐོན་ལས་སྐྱེད་སྲིང་བྱ་རྒྱུ་འཇུག་གཞིར་བྱེད་པ་དང་། ལས་ཞུགས་ལ་སྐུལ་འདེད་གཏོང་རྒྱུ་ཤུགས་རྒྱག་སར་བྱེད་པ། དམངས་འཚོ་འགན་ལེན་བྱ་རྒྱུ་དོན་ལ་བབས་སར་བྱེད་པ་བཅས་ཀྱི་ཐོག་ནས་ཕྱོཌ་ཡོངས་དང་རིམ་པ་མང་བའི་དབུལ་སྐྱོར་རོགས་ལས་བྱས་པར། རིམ་རྩིས་བྱས་ན་ནོར་སྲིད་ཀྱི་རོཌ་སྐྱོར་མ་དངུལ་སྒོར་ཁྲི་8291ཟིན་པ་དང་། སྤྱི་ཚོགས་ཀྱི་རོགས་སྐྱོར་མ་དངུལ་སྒོར་ཁྲི་1269ཟིན་པ། ཞལ་འདེབས་དངོས་པོའི་རིན་ཐང་སྒོར་ཁྲི་588ཟིན་པ། འཛད་སྤྱོད་དབུལ་སྐྱོར་སྒོར་ཁྲི་500ཙམ་ཟིན་པ། རོགས་སྐྱོར་རྣམ་གྲངས་39ཟིན་པ། ཕན་པ་ཐོབ་པའི་མི་འབོར་དབུལ་པོ་9700ཟིན་ཡོད། 2019ལོའི་ལོ་མཇུག་བར། རྔ་པ་རྫོང་གིས་རིམ་རྩིས་བྱས་ན། དུད་ཚང་3317གྱི་མི་15786དབུལ་སྒྲོལ་བྱས་ནས། 2020ལོའི་ཟླ་2པར་རྒྱལ་ཁབ་ཀྱི་རྫོང་དབུལ་པོའི་གྲས་ནས་དངོས་སུ་བུད་པ་རེད།